Përplasjet mes protestuesve dhe Policisë në Tiranë kanë vazhduar edhe mbrëmjen e së dielës, më 18 tetor, ndërsa një breshëri e madhe fishekzjarrësh është hedhur në drejtim të efektivëve të rendit.
Ngjarja është regjistruar në zonën prapa Bankës së Shqipërisë, ku protestuesit janë përballur sërish me forcat policore.
Në pamjet e siguruara nga gazetarja e Top Channel, Elda Menga, shihen fishekzjarrë të shumtë që shpërthejnë në drejtim të policëve, duke krijuar skena të tensionuara në rrugët e kryeqytetit.
Sipas raportimit, protestuesit ishin larguar nga Sheshi Skënderbej dhe po tentonin të riktheheshin drejt Ministrisë së Arsimit, ku gjatë ditëve të fundit janë zhvilluar përplasje të vazhdueshme.
Përballë hedhjes së fishekzjarrëve, Policia ka ndërhyrë me gaz lotsjellës për të shpërndarë protestuesit dhe për të penguar avancimin e tyre.
Incidenti ndodh në ditën e gjashtë të protestave kundër Qeverisë së kryeministrit Edi Rama, të cilat nisën me kërkesat e studentëve për përmirësimin e kushteve në arsim dhe janë zgjeruar me thirrje për dorëheqjen e ekzekutivit.
Gjatë ditëve të mëparshme, protestat janë shoqëruar me hedhje gurësh, molotovësh dhe fishekzjarrësh, ndërsa Policia ka përdorur gaz lotsjellës dhe automjete ujëhedhëse.
Më 17 tetor, përplasjet shkaktuan dëmtime në disa institucione dhe biznese në Tiranë, si dhe lëndime mes protestuesve dhe efektivëve policorë.
Deri në momentin e raportimit, nuk është konfirmuar nëse gjatë incidentit të fundit pranë Bankës së Shqipërisë ka pasur persona të lënduar.
