Partia Demokratike e Kosovës ka reaguar lidhur me situatën e krijuar në Kuvendin e Kosovës, duke u përpjekur t’ua sqarojë qytetarëve se çfarë përcaktojnë Kushtetuta, aktgjykimi i Gjykatës Kushtetuese dhe Rregullorja e Kuvendit.
Përmes një shkrimi të publikuar në Facebook, PDK ka pretenduar se situata aktuale përbën suspendim dhe goditje ndaj rendit kushtetues. Partia ka paraqitur disa pika që, sipas saj, përcaktojnë afatet dhe mënyrën se si duhet të zhvillohet procesi i konstituimit të Kuvendit.
Sipas PDK-së, Kushtetuta përcakton se Kuvendi duhet të konstituohet brenda 30 ditësh nga shpallja zyrtare e rezultateve të zgjedhjeve.
Partia ka theksuar se Gjykata Kushtetuese e ka sqaruar këtë çështje, duke vlerësuar se afati 30-ditor nuk nënkupton vetëm fillimin e procesit të konstituimit, por që brenda këtij afati Kuvendi duhet të përfundojë konstituimin.
Në reagimin e saj, PDK i është referuar edhe Rregullores së Kuvendit. Sipas interpretimit të partisë, deri në përfundimin e seancës konstituive, përfshirë zgjedhjen e kryetarit dhe nënkryetarëve, ndërprerjet e seancës nuk mund të zgjasin më shumë se 48 orë.
“Afati 30-ditor ka kaluar pa u konstituuar Kuvendi. Tash po shpërfillet edhe rregulli 48-orësh”, ka deklaruar PDK-ja.
Partia Demokratike e Kosovës ka kërkuar që qytetarët të jenë të informuar për bazën kushtetuese dhe rregullat që lidhen me funksionimin e Kuvendit, ndërsa situata e krijuar pritet të vazhdojë të jetë pjesë e debatit politik dhe institucional.
Në këtë fazë, përplasja kryesore politike lidhet me interpretimin e afateve dhe procedurave që duhet të ndiqen për konstituimin e Kuvendit dhe funksionalizimin e plotë të tij.
