Kryesuesi i seancës konstituive të Kuvendit të Kosovës, Avni Dehari, ka folur për mos-thirrjen e vazhdimit të seancës dhe për çështjen e afateve që lidhen me konstituimin e Kuvendit.
Dehari ka deklaruar se aktualisht nuk ekziston një sanksion që do të mund të penalizonte Kuvendin apo t’i jepte fund mandatit të kësaj legjislature në rast të tejkalimit të afateve.
Duke folur para mediave, ai ka thënë se vazhdimi i seancës do të thirret kur të arrihet një marrëveshje mes partive politike.
“Seancën kur të ketë marrëveshje”, ka deklaruar Dehari, duke lënë të kuptohet se mungesa e një dakordimi politik po ndikon në vazhdimin e procesit të konstituimit.
Çështja e afateve është bërë temë e debatit politik dhe juridik, pasi Rregullorja e Kuvendit përcakton se ndërprerjet gjatë seancës konstituive nuk mund të zgjasin më shumë se 48 orë. Ndërkohë, janë ngritur edhe pretendime se procesi duhet të përfundojë brenda afatit kushtetues prej 30 ditësh.
Dehari ka insistuar në nevojën për një marrëveshje politike mes subjekteve parlamentare, ndërsa situata vazhdon të mbetet e bllokuar për shkak të mungesës së dakordimit për hapat e ardhshëm.
Në anën tjetër, partitë opozitare kanë kritikuar mënyrën se si po zhvillohet procesi dhe kanë kërkuar respektimin e afateve dhe procedurave kushtetuese.
Ndërkohë, mbetet e paqartë se kur do të thirret sërish seanca konstituive, pasi vendimi për vazhdimin e saj lidhet me zhvillimet politike dhe mundësinë e arritjes së një marrëveshjeje mes partive.
