Një 26-vjeçar është arrestuar në Gjermani nën dyshimin se ka vrarë me thikë nënën dhe babanë e tij në banesën ku jetonin së bashku.
Ngjarja ka ndodhur më 19 gusht në Bad Neuenahr-Ahrweiler, ndërsa viktimat, 52 dhe 55 vjeç, dyshohet se kanë humbur jetën si pasojë e plagëve të shumta të shkaktuara me thikë.
Sipas Prokurorisë, 26-vjeçari kishte telefonuar vetë Policinë rreth orës 04:00. Ai kishte deklaruar se nëna e tij ishte plagosur me thikë, ndërsa për babanë kishte thënë se “po flinte”.
Megjithatë, hetuesit dyshojnë se deklarimet e tij nuk përputhen me gjurmët e gjetura në vendin e ngjarjes. Edhe i dyshuari kishte pësuar plagë në pjesën e barkut dhe ishte dërguar për trajtim në spital.
26-vjeçari tani ndodhet në paraburgim, ndërsa ndaj tij po zhvillohen hetime për dyshimin e vrasjes së dyfishtë.
