Një përplasje e rëndë mes dy anijeve tregtare është regjistruar në orët e para të mëngjesit në brigjet e Stambollit, ndërsa autoritetet turke kanë nisur një operacion të gjerë kërkim-shpëtimi për 10 anëtarë të ekuipazhit.
Ngjarja ka ndodhur rreth orës 03:00, rreth 18 milje detare në jug të Silivrit, kur anija tregtare me flamur turk Alsu u përplas me anijen Tugberk Imamoglu, e cila po lundronte në drejtim të Karadeniz Ereğlit.
Sipas autoriteteve, pas përplasjes është humbur kontakti me Tugberk Imamoglu dhe me 10 anëtarët e ekuipazhit që ndodheshin në bord. Për këtë arsye, ekipet e emergjencës kanë nisur menjëherë kërkimet në zonën ku ndodhi aksidenti.
Në operacion janë angazhuar mjete të Drejtorisë së Përgjithshme të Sigurisë Bregdetare, anije të Rojës Bregdetare të Marmarasë dhe Ngushticave, si dhe helikopterë.
Alsu ishte nisur nga Kocaeli me destinacion Aliaga, ndërsa Tugberk Imamoglu kishte dalë nga porti i Iskenderunit dhe po udhëtonte drejt Karadeniz Ereğlit. Në momentin e përplasjes, anija e dytë po transportonte çelik të mbështjellë.
Fillimisht, vlerësimet në vendngjarje nuk evidentuan dëme të dukshme në Alsu. Ndërkohë, autoritetet nuk kanë mundur të lidhen me Tugberk Imamoglu dhe ekuipazhin e saj. Raportimet e mëvonshme bëjnë të ditur se anija është fundosur, ndërsa pajisje shpëtimi, përfshirë një varkë shpëtimi, janë gjetur në det pa anëtarët e ekuipazhit brenda.
Operacioni për gjetjen e 10 personave vijon në detin Marmara, ndërsa autoritetet turke po hetojnë rrethanat dhe shkakun e përplasjes.
