Prokuroria Speciale e Kosovës ka dorëzuar aktakuzën lidhur me vrasjen e civilëve shqiptarë të familjes Jashari në Prekaz të Skenderajt.
Kryeprokurori i Prokurorisë Speciale, Blerim Isufaj, e ka cilësuar ngritjen e aktakuzës si një hap të rëndësishëm në përmbushjen e mandatit ligjor të institucionit që drejton.
Sipas Isufajt, kjo është aktakuza e parë që lidhet me vrasjen e civilëve të familjes Jashari në Prekaz.
Ai ka thënë se aktakuza është rezultat i një pune profesionale dhe të bazuar në prova, ndërsa tash i takon gjykatës që ta vlerësojë atë dhe provat e paraqitura.
Isufaj ka theksuar se Prokuroria Speciale ka punuar me kujdes të shtuar për të siguruar që pretendimet e ngritura në aktakuzë të provohen para gjykatës.
Sipas tij, rëndësia e këtij rasti qëndron edhe në përkushtimin për trajtimin e krimeve të luftës dhe kërkimin e përgjegjësisë penale, pavarësisht kompleksitetit të rasteve dhe kohës së gjatë që ka kaluar nga kryerja e tyre.
Kryeprokurori ka veçuar edhe rëndësinë e bashkëpunimit ndërkombëtar të Prokurorisë Speciale, duke përmendur partneritetin me Shtetet e Bashkuara të Amerikës, Mbretërinë e Bashkuar, Europolin dhe Eurojustin.
Tashmë, vlerësimi i aktakuzës dhe provave të paraqitura i takon gjykatës, e cila duhet të vendosë në përputhje me ligjin dhe standardet e një gjykimi të drejtë.
