Gjykata ka caktuar një muaj paraburgim ndaj pronarit të kompanisë në lidhje me vdekjen e një 29-vjeçari në vendin e punës, gjatë ndërtimit të stacionit të ri policor në Zubin Potok.
Rasti ka ndodhur më 1 shtator, kur 29-vjeçari, i cili ishte punëtor i një kompanie private, pësoi lëndime të rënda trupore gjatë punës në kantier. Ai fillimisht u dërgua në Qendrën Kryesore të Mjekësisë Familjare në Zubin Potok dhe më pas në Spitalin Rajonal në Mitrovicën e Veriut. Pavarësisht trajtimit mjekësor, rreth orës 11:00 u konstatua vdekja e tij.
Pas ngjarjes, në vendin e punës dolën njësitet përkatëse të Policisë së Kosovës, inspektorët komunalë dhe inspektorët e punës. Me urdhër të prokurorit, trupi i pajetë i viktimës u dërgua për obduksion në Institutin e Mjekësisë Ligjore.
Prokuroria ka nisur hetimet për veprën penale që lidhet me asgjësimin, dëmtimin ose heqjen e pajisjeve mbrojtëse dhe rrezikimin e sigurisë në vendin e punës.
Në kuadër të hetimeve, është intervistuar një person me inicialet B.B., i lindur në vitin 1977, i cili fillimisht ishte ndaluar për 48 orë me urdhër të Prokurorit të Shtetit.
Më pas, ndaj tij është kërkuar masa e paraburgimit, ndërsa gjykata ka vendosur që ai të qëndrojë një muaj në paraburgim.
Hetimet po vazhdojnë për të sqaruar plotësisht rrethanat në të cilat ndodhi aksidenti dhe për të përcaktuar përgjegjësinë eventuale për sigurinë në vendin e punës.
Rasti ka rikthyer në vëmendje edhe problemin e aksidenteve me pasoja fatale në vendet e punës në Kosovë. Sipas raportimeve të publikuara pas rastit në Zubin Potok, numri i personave që kishin humbur jetën në vendet e punës gjatë vitit 2026 kishte arritur në 16.
I dyshuari gëzon të drejtën të konsiderohet i pafajshëm derisa fajësia e tij të vërtetohet me vendim të formës së prerë.
