Operacioni për zhvarrosjen dhe identifikimin e mbetjeve mortore në fshatin Kalludër të Zubin Potokut ka hyrë në ditën e dytë, ndërsa ekipet e institucioneve kompetente po vazhdojnë gërmimet në lokacionin ku dyshohet se ndodhen mbetjet e 23 personave të zhdukur gjatë luftës së fundit në Kosovë.
Në terren janë të angazhuara ekipet e Institutit të Mjekësisë Ligjore, Prokurorisë Speciale, Policisë së Kosovës, Komisionit Qeveritar për Persona të Zhdukur dhe përfaqësues të EULEX-it. Procesi po zhvillohet sipas urdhrit të Gjykatës Themelore në Prishtinë dhe në përputhje me standardet profesionale për zhvarrosjen, ruajtjen e provave dhe identifikimin e mbetjeve mortore.
Dyshimet lidhen me fatin e 23 intelektualëve shqiptarë nga Mitrovica, të cilët u rrëmbyen më 19 prill 1999 dhe që prej asaj kohe figurojnë në listën e personave të zhdukur. Gjetjet e deritanishme kanë shtuar shpresat e familjarëve se pas më shumë se dy dekadash mund të zbardhet fati i të afërmve të tyre.
Ministri në detyrë i Punëve të Brendshme, Xhelal Sveçla, i cili ka vizituar lokacionin, deklaroi se zbulimi i kësaj varreze të dyshuar është rezultat i punës intensive të institucioneve të sigurisë dhe bashkëpunimit me qytetarët. Ai theksoi se autoritetet nuk do të ndalen derisa të zbulohet fati i personit të fundit të zhdukur dhe të sillen para drejtësisë përgjegjësit për këto krime.
Ndërkohë, Prokuroria Speciale ka konfirmuar se hetimet po vazhdojnë paralelisht me procesin e gërmimeve. Në kuadër të këtij rasti janë ndaluar edhe dy persona të dyshuar, ndërsa institucionet kanë bërë të ditur se çdo veprim po zhvillohet me kujdes për të ruajtur integritetin e provave dhe për të mundësuar identifikimin shkencor të mbetjeve mortore.
Ekspertët e mjekësisë ligjore kanë konfirmuar se mbetjet e gjetura janë me origjinë njerëzore dhe me interes mjeko-ligjor, ndërsa puna në terren pritet të vazhdojë edhe në ditët në vijim për shkak të kompleksitetit të lokacionit dhe terrenit ku po zhvillohen gërmimet. Autoritetet kanë paralajmëruar se rezultatet përfundimtare do të bëhen publike vetëm pas përfundimit të analizave dhe identifikimeve përkatëse.
