Tre shtetas të Bosnjë e Hercegovinës janë dënuar nga Gjykata Komunale në Dubrovnik pasi kanë publikuar në rrjetet sociale materiale që glorifikonin Ratko Mlladiqin, ish-komandantin e Ushtrisë së Republikës Sërpska, i dënuar me burgim të përjetshëm për gjenocid, krime kundër njerëzimit dhe krime lufte.
Sipas autoriteteve kroate, tre personat, të moshës 31, 30 dhe 25 vjeç, ndodheshin në Kroaci me qëndrim të përkohshëm. Në profilet e tyre publike në rrjetet sociale ata kishin publikuar fotografi, simbole, këngë dhe tekste përmes të cilave i shprehnin nderime dhe mirënjohje Mlladiqit.
Policia kroate tha se këto publikime kanë shkaktuar shqetësim dhe ndjenjë të cenimit te qytetarët, ndërsa veprimet e tyre u trajtuan si shkelje e ligjit për kundërvajtjet kundër rendit dhe qetësisë publike.
Hetimet ndaj tyre u zhvilluan nga 28 gushti deri më 2 shtator. Në kuadër të rastit janë përfshirë gjithsej katër shtetas të Bosnjë e Hercegovinës dhe një shtetas kroat. Të gjithë ishin arrestuar dhe ishin dërguar para Gjykatës Komunale në Dubrovnik.
Gjykata ka shpallur fajtorë tre shtetasit e Bosnjës dhe Hercegovinës në një vendim jo të formës së prerë dhe i ka dënuar me gjoba. Përveç kësaj, atyre do t’u anulohen lejet e qëndrimit dhe të punës në Kroaci, ndërsa është caktuar edhe ndalim tre-mujor për hyrjen në territorin kroat.
Autoritetet kanë nisur gjithashtu procedurën për dëbimin e tyre nga Zona Ekonomike Evropiane. Në këtë kuadër parashihet edhe ndalim dyvjeçar i hyrjes, i cili do të hyjë në fuqi pasi vendimi gjyqësor të bëhet përfundimtar.
Ndërkohë, rasti ndaj shtetasit të katërt të Bosnjë e Hercegovinës dhe shtetasit kroat pritet të vazhdojë para gjykatës në Dubrovnik.
Ratko Mlladiqi, i cili vdiq së fundmi në Hagë, ishte dënuar me burgim të përjetshëm nga drejtësia ndërkombëtare për krime të kryera gjatë luftës në Bosnjë e Hercegovinë, përfshirë gjenocidin në Srebrenicë. Vendimi ndaj tij e shpalli fajtor edhe për përndjekje, vrasje, dëbim të popullsisë, terrorizim të civilëve gjatë rrethimit të Sarajevës dhe marrjen peng të pjesëtarëve të forcave paqeruajtëse të Kombeve të Bashkuara.
Rasti në Dubrovnik vjen në një periudhë kur në Serbi dhe në pjesë të rajonit janë shtuar reagimet pas vdekjes së Mlladiqit dhe publikimeve në nderim të tij. Glorifikimi i tij ka shkaktuar kritika të shumta, veçanërisht për shkak të dënimit të tij për gjenocid dhe krime lufte.
