Një rast i rëndë me pasoja të thella emocionale dhe sociale është raportuar në Ferizaj, ku një vajzë e mitur ka denoncuar se është ngacmuar seksualisht në mënyrë të vazhdueshme nga babai i saj për më shumë se një vit.
Sipas raportimit nga Sinjali, rasti është raportuar më 17 janar 2026, rreth orës 23:30. Viktima, me inicialet A.B., ka paraqitur ankesë ndaj të dyshuarit M.B., duke deklaruar se ai kishte ushtruar ndaj saj ngacmime seksuale sistematike për rreth një vit e gjysmë.
Sipas dëshmisë së të miturës, veprimet e dyshuara kanë ndodhur në periudha të ndryshme, ndërsa ajo ka qenë vazhdimisht nën presion psikologjik dhe frikë.
Në kuadër të hetimeve, është intervistuar edhe nëna e vajzës, e cila ka dhënë deklaratë për zhvillimet e fundit brenda familjes. Ajo ka deklaruar se dy ditë më parë ishte sulmuar fizikisht nga bashkëshorti, pasi e kishte njoftuar se vajza e tyre kishte krijuar një lidhje dashurie, gjë që kishte shkaktuar reagim të dhunshëm nga ana e tij.
Gjatë intervistimit, i dyshuari ka mohuar kategorikisht akuzat, duke deklaruar se nuk ka kryer veprat penale për të cilat akuzohet.
Pas intervistimit të palëve dhe vlerësimit fillestar të provave, me vendim të Prokurorit të Shtetit, rasti është iniciuar për veprat penale “Ngacmimi seksual” dhe “Sulmi”. I dyshuari është dërguar në Qendrën e Ndalimit në Ferizaj, ku do të qëndrojë për 48 orë.
Hetimet janë në zhvillim e sipër dhe autoritetet kanë paralajmëruar veprime të tjera procedurale, përfshirë sigurimin e provave shtesë dhe sqarimin e plotë të rrethanave të rastit.
